گونئي آذربايجان ديالوگ توپلانتيسي نین بيانيه سی
يكشنبه ، 22 آذر 1388 ، *- منبع : سایت gunaz.tv گونازتي وي
آمستئردام ديالوق توپلانتيسي ايران ايسلام جومهورييتي نين سياسي، ايقتيصادي و ايجتيماعي بؤحرانلار ايچينده چابالاديغي گونلرده کئچيريلمکده دير. سياسي حاکيمييت جيدي سارسينتيلار ايچينده دير. ايراندا ياشايان ميللتلر، اوللر اولدوغو کيمي، بو رئژيمين باسقيسي آلتيندا ياشاماق ايستمه ديکلري اوچون اؤز اعتيراضلاريني بيلديرمکده ديرلر. ديني دئسپوتيزمين سونو گلديگي بو گونلرده آذربايجان تورک ميللتينين ميللي موباريزه سينه داها گئنيش شکيلده شاهيد اولماقداييق. داها اؤنجه دن آذربايجان ميللي حرکاتي " 1 ارديبهشت، آذربايجان اؤرنجي حرکاتي"(1374)، "دانيشير آذربايجان" (1384) و تبريزده قبول اولونان "بيرينجي آنا ديلي قورولتايي نين قطعنامه سي" (1384)، بابک قالاسينا يوروشلر، 1 خورداد، ميللي قييامي(1385) کيمي، اؤنملي تاريخي درينليگي اولان اولايلاري مئيدانا گتيرميشدير. آمستئردام ديالوق توپلانتيسينا قاتيلان وطنداشلاريميز ميللي حرکات سيرالاريندا اهمييتلي اورتاق يؤنلرين وار اولدوغونا قطعييتله اينانيرلار. حرکاتين سيرالاريندا چوخسسليليگي قبول ائديرلر. تک سسلي بير فعالييتي رسمييته تانيميرلار. تاريخي اهمييت داشييان آمستئردام توپلانتيسي ايشتيراکچيلاري آذربايجان ميللي حرکاتي نين سيرالاريندا چئشيدلي فيکير وسياسي آخيملارين وار اولدوغونو بير رئالليق وساغلام دوروم کيمي گؤرورلر. بو گؤروش دييشيکليگي، مدني موختارييتي، فئدئراليزمي، ايستيقلالييتي وبوتؤو آذربايجان دؤولتي قورماق کيمي پلاتفورملاري ائحتيوا ائتمکده دير. توپلانتي بوتون دييشيک گؤروشلري آذربايجانين مشروع سياسي جريانلاريي کيمي قبول ائدير و فرقليليکلرين بير زنگينليک اولدوغونا اينانير.
ايران ايسلام جومهورييتي داخيلدن وخاريجدن جيدي تضييقلر آلتيندادير. بو سببدن رئژيم هرگون جمعيت اوزرينه باسقيسيني آرتيرماق و ميللي حرکتي ازمک ايستيهجک. ميللي ديره نيش آرتديقجا، رئژيمين تضييقلري آرتا بيلر. چونکو حاکيمييت بو دورومدان گئري آدديم آتارسا، اؤز مغلوبييتينه ايمضا آتميش اولار. بو اوزدن ده گون کئچديکجه، رئژيمين تضييقلرينين آرتاجاغينا شاهيد اولوروق. بئله بير دورومدا ميللي حرکاتين خاريجده کي فعاللاري نين اوزرينه بؤيوک تاريخي مسئوليت دوشمکده دير. بو ميللي – تاريخي وظيفهني آنلاماق اوچون ميلتيميزين اساس ايستکلريني درک ائديب، بوتون ايمکانلارا داياناراق، ميللي حرکاتي مودافيعه ائتمه لي و گوجلنديرمه ليگيک.
21 آذر آيريجا، بؤيوک ميللي ليدر سيد جعفر پيشهوري نين اؤز ميلتينه گوونهرک، تاريخ ياراتديغي دوغما ميللي بير گونودور. بو تاريخي گون موناسيبتي ايله وطنيميزين قورتولوشو ايله باغلي قرارا گلمک، ميللي بيرليک نومونه سي سرگيله مک هئچ ده تصادوفي دئييلدير.
ميللي حرکاتين گئنيش ميقياسلي اولدوغونو قبول ائدن 21 آذر آمستئردام ديالوق توپلانتيسي بوتون فرقلي گؤروشلري گؤز اؤنونده بولوندوراراق، آشاغيداکي مادده لري اورتاق پرينسيپلر اولاراق قبول ائدير :
1- توپلانتي، گونئي آذربايجان تورک ميلتي نين ميللي آزادليغي يولوندا موباريزه ده بو گونکو فارس راسيسميني تمثيل ائدن ايران ايسلام جومهورييتيني اساس مانعه کيمي گؤرور. چونکو بو رئژيم هر نؤوع دئموکراتيک دييشيکلييه قارشيدير
2- آذربايجان ميللي آزادليق حرکاتي نين آمالي گونئي آذربايجاندا ميللي – دئموکراتيک دؤولت قورماقدير. آيريجا، گونئي آذربايجانين حودودلاري خاريجينده ياشايان ديگر تورک خالقلاري نين ميللي هاقلاريني دا قوروماق لازيمدير. آذربايجان ميللي حرکاتي اؤز موقددراتيني تعيين ائتمکده سون سؤز صاحيبي اولماليدير.
3- آذربايجان ميللي حرکاتي سئکولار دؤولت قورولماسي نين طرفداريدير و بو يولدا موباريزه آپارير.
4- تورک ديلي (آذربايجان تورکچه سي) رسمي دؤولت ديلي اولماليدير. بوتون اؤلکه ده ياشايان تورکلر اوچون تورک ديللي مئديا شبکه لري قورولماليدير. آذربايجانين علمي، تئخنيکي و ايقتيصادي اينکيشافي تأمين ائديلمهلي، ميلتيميزين ياشاييش سوييه سي دونيانين اينکيشاف ائتميش ميلتلري سوييه سينه يوکسلمه ليدير.
5- آذربايجان ميللي حرکاتي، بوتون ساحه لرده قادين- کيشي حوقوق برابرليگي يولوندا موباريزه آپارير.
6- دين، مذهب، مسلک، اينانج، سؤز، مطبوعات، سنديکالار، سياسي پارتييالار، گئييم و ياشام طرزي کيمي، بوتون مدني آزادليقلار قئيدسيز-شرطسيز تمين ائديلمه ليدير.
7- آذربايجان ميللي حرکاتي اعداما و هر نؤوع ايشگنجه يه قطعي شکيلده قارشيدير.
8- ميللي حرکات آريا راسيسم سيستئمي نين تمثيلچيسي اولان ايران ايسلام جومهورييتينه نين آذربايجاندا دئموقرافيک ياپيني دييشديرمه سيياستينه قارشي چيخيب و بو رئژيمه قارشي ميللي ظولم آلتيندا ياشايان ديگر ميلتلرله ايشبيرليگي آپارماليدير.
9- يوخاريدا قئيد ائديلن هدفلره چاتماق اوچون خاريجده فعالييت گؤسترن آذربايجانلي قوووه لر، داخيلده گئدن ميللي موباريزهني ديقتله تعقيب ائتمه لي و اونا اولوسلار آراسي اينسان هاقلاري مرکزلريندن دستک قازانمالي، آذربايجانا قارشي اينفورماسييا بلوکاداسيني قيرمالي و بوتون دونيادا آذربايجان ميللي منافعي اوچون لوببيچيليک فعالييتلريني تشکيلاتلانديرماليدير.
10- گونئي آذربايجان ميللي حرکتي موستقيل، دئموکراتيک و مودئرندير.
11- گونئي آذربايان ميللي آزادليق حرکاتي دونيا اينسان هاقلاري بياننامهسينين و اونا باغلي کونوانسييونلارين آذربايجاندا حياتا کئچيريلمه سي اوچون موباريزه آپارير.
12- آمستئردام ديالوق توپلانتيسي يوخاريداکي پرينسيپلره داياناراق گونئي آذربايجان ميللي حرکاتيندا فعاليت گؤسترن بوتون تشکيلاتلار و شخصلري داواملي ايشبيرليگي مئخانيزماسينن قورولماسينا چاغيرير.
ياشاسين آذربايجان
ياشاسين ميللي بيرليگيميز
آمستئردام 21 آذر 1388 - 12 دئکابر 2009
هیچ نظری موجود نیست:
ارسال یک نظر